>> Hōkūalaka‘i | >> Honua Ho‘okolohua Ola | >> He
Lani Ko Luna
No ka māla
Kino maika‘i mai ka māla i ka ‘ōlelo a kahiko, “Ma ka hana ka ‘ike.” He ‘ehiku ‘eka ka nui o ia honua ho‘okolohua ‘ike o ka papahana He Lani Ko Luna, He Honua Ko Lalo i ho‘omaka ‘ia ma ka MH 1998. ‘O Lepo Ola me Kīpulu ia mau ho‘okolohua mua ‘ana e kia ana ma luna o ka ho‘ōla ‘ana i ka lepo wela e waiho mai ana a me ka hana pū ‘ana i ke kīpulu e māhuahua a‘e ai ka ho‘oulu meakanu ‘ana.
Ua kō ia mau ho‘okolohua ‘ana ‘elua ma ka ho‘opō‘aiapuni ‘ana he 80% o ka moka pa‘upopo a ho‘iho‘i ‘ia i ka ‘āina iho nō. ‘O ka pepa kīhaehae (i loa‘a nui mai ke Kula me nā ke‘ena mai e pili pū ana); ka lepo holoholona (‘o ko ka pua‘a ka nui loa); a pēia ho‘i ka moka meakanu ka nui o ia mau mea i ho‘opō‘aiapuni ‘ia i loko o ka māla iho nō. A pau a‘ela he ‘ehiku makahiki, ua ‘āina lepo ola nō ka māla e ulu ikaika nei nā meakanu ‘ōiwi o kēlā ‘ano, kēia ‘ano.
‘O ka mahi ‘ai nui o ia māla e waiho mai nei ‘o Isaia Kealoha no Kalapana, Hawai‘i mai. I waena o nā haumāna a me nā limahana o ke Kula, ua aloha nui ‘ia ‘o Mr. Kealoha ma ka inoa kapa ‘o “‘Anakala Isaia”. He ‘ike kino nō ho‘i ko ‘Anakala mai kona wā kamali‘i mai ma nā hana mahi ‘ai me ka lā‘au lapa‘au kekahi; he hale ho‘oulu meakanu pono‘ī nō kai ho‘oka‘awale ‘ia i honua ho‘oulu lā‘au. A‘o pū ‘o ‘Anakala Isaia i kona ‘ike lā‘au lapa‘au ma lalo o Ka Haka ‘Ula O Ke‘elikōlani, he ho‘okahi papa o ke kau.
A puni ho‘i ia māla ‘ehiku ‘eka, e hiki nō ho‘i i nā malihini kipa mai ke ‘ike i nā ‘ai nui a ka Hawai‘i: he kalo, he ‘uala, he ‘ulu, a pēia ho‘i nā meakanu nui ‘ē a‘e, ‘o ka niu, ka mai‘a, me ia meakanu aku, ia meakanu aku. E hiki nō ho‘i ke ‘ike ‘ia ke koa, ka hau a me ka pūhala, ‘o nā lā‘au nui i pa‘a ai ka wa‘a holo moana. Pēia ho‘i ka hiki ke ‘ike i kekahi mau meakanu hou aku i ho‘ohana maoli ‘ia i ka wā ma mua no kēlā ‘ano hana, kēia ‘ano hana: ‘o ka milo me ke kou (i pola), ke kukui (i kālī kukui), ka ‘ōhi‘a (i lā‘au kūkulu hale me ke ki‘i akua) a me ka pōhue, a ipu paha ma kekahi ‘ōlelo ‘ana. ‘O ka Hale Kahūmu kahi honua e hiki ai ke ho‘omākaukau ‘ia ka mea‘ai na kānaka ma ka imu.
A pili i ka ‘āpono ‘ia, ua hiki nō ho‘i ke ho‘olauka‘i ‘ia he kipa i ia honua ho‘okolohua, ‘o ka māla, ma ka ho‘oka‘a‘ike ‘ana me ko He Lani Ko Luna, He Honua Ko Lalo ma: helani@ahapunanaleo.org.