>> Hōkūalaka‘i | >> Māla | >> He
Lani Ko Luna
No ka honua ho‘okolohua ola
‘O nā honua e lako nei ka papahana ho‘ona‘auao kaiāulu ‘o He Lani Ko Luna, he mau honua ho‘okolohua ola nō ho‘i ia kahi e ho‘oulu ‘ia ai ka na‘auao mauli Hawai‘i. ‘O nā papahana ‘āina, wai me ka mauha‘a, he mau pāhana ia i ho‘omohala mua ‘ia na ka ‘Aha Pūnana Leo, a ho‘ohana ‘ia nō ia mau hona a mauha‘a ma ‘elua ‘ano kā‘ei ‘oko‘a. Mālama ‘ia nā hanana pili ‘āina ma ka māla 10 ‘eka o ke kula ho‘okolohua ‘o Nāwahīokalani‘ōpu‘u ma Kea‘au, Puna, Hawai‘i. Ho‘oulu ‘ia ka mea‘ai Hawai‘i ku‘una, ‘o ke kalo, ka ‘ulu, ka ‘uala, a pēia ho‘i nā meakanu ho‘ohana me nā meakanu ho‘okīnohinohi. Ho‘oka‘awale ‘ia he hale meakanu i kīpuka e ho‘oulu ‘ia ai ka lā‘au lapa‘au maoli. I loko pū o ua māla nei ka Hale Kahūmu, kahi e komo ai kānaka i loko o ka hana maoli, he ho‘omākaukau mea‘ai ma ke kaila ku‘una. Mālama ‘ia ia honua māla a a ho‘okele pū ‘ia nā papahana e ho‘ohana ‘ia ai ia māla na nā limahana ‘Aha Pūnana Leo.
Mālama ‘ia nā hanana pili kai ma Hilo One, Hilo Bay me Kai Ula, kahi ho‘i o Waiuli e waiho mai nei, e ho‘omākaukau ana i nā kānaka ma nā ‘ike e palekana ai ke komo ‘ana i loko o nā hana pili i ke kai me ke kapa kai o ia mau wahi. ‘O nā mākau ho‘opakele ola nā ha‘awina mua loa e ho‘oikaika ‘ia na nā limahana i laikini ‘ia ma ia mau pō‘ai ‘ike. ‘O Huia me Hikanui aku kekahi honua ho‘ona‘auao e alu like ai kānaka ma ka hoe like ‘ana. ‘O Kea‘eloa, he wa‘a kaulua 30‘ ka lō‘ihi, kekahi honua ho‘ona‘auao e kālele ana ma nā ‘ike kahua o ka ho‘okele wa‘a ‘ana. A mākaukau ma nā ‘ike Kea‘eloa, ‘o Hōkūalaka‘i ka wa‘a kaulua 57‘ ka lō‘ihi e lawelawe ana i nā ‘ike kūlipo o ka holo ma ka moana ākea.