‘O ka ho‘omāhuahua ‘ana a‘e he pū‘uo nona nā kānaka mākaukau loa ma ka ho‘ona‘auao me ke kālai‘ike, a komo pū ma kēia pū‘uo nā ‘ohana nō ho‘i e mākaukau ana e ‘auamo i ka ho‘oikaika me ka ho‘omau ‘ia o ke ola o ka mauli Hawai‘i i loko ho‘i o ka ‘ōnaehana ho‘ona‘auao ‘ōlelo Hawai‘i, ka mea nāna ho‘okahi mai nō kānaka o ke au i hala akula i ‘ike loa i ke kākau me ka heluhelu i kā kākou ‘ōlelo Hawai‘i iho nō. He mea ua Lamakū nei e nānā ana i ke Kānāwai 133, i pūlima ‘ia maila na ke Kia‘āina Linda Lingle i ka MH 2004, e ho‘onui a‘e ana i ka papahana ho‘ona‘auao kaiapuni ‘ōlelo Hawai‘i e kū nei ma ka ho‘okumu ‘ana i papahana ho‘ona‘auao e kō ai i nā keiki ‘ōlelo Hawai‘i nā koina ho‘ona‘auao o ka Moku‘āina i loko nō o ka ‘ōlelo Hawai‘i.
Iā Lamakū e hiki ai ke kō ua Kānāwai 133 nei ma: 1) ka ho‘omākaukau ‘ana i nā ‘ohana Hawai‘i e komo ma ka ‘imi na‘auao kulanui; 2) ka ho‘omākaukau ‘ana i nā haumāna Hawai‘i e lewa ai ke noi a me ke komo kulanui ‘ana; a me 3) ke kāko‘o ‘ana i nā mea ho‘ona‘auao ‘ōiwi Hawai‘i.
>> Ke kū ‘ana i nā koina | >> Ka palapala noi | >> Nā loulou kōkua
Lamakū, ka māhele ha‘awina kālā kōkua hele kulanui
Ua kapa ‘ia kēia māhele ha‘awina kālā kōkua hele kulanui nei ‘o Lamakū ma ka mana‘o ‘o ka lamakū: he ‘ohe i pa‘a ‘o luna i kekahi ‘ano kālī kukui ‘ana i wahī ‘ia i ka lā‘ī malo‘o e ho‘omālamalama a‘e ana i ka pō‘ele‘ele. ‘O ka mālamamala me ke kukui, he mau mea ia e kū hō‘ailona ana no ka ‘ike ma ka na‘auao, a no laila ma ka inoa ‘ana ‘o Lamakū, pēia ho‘i ka mana‘o kālele ma luna o ka loina ku‘una ‘o ke aloha na‘auao: “Ua ao Hawai‘i, ke ‘ōlino nei.”
Mai loko mai o ke Kānāwai Ho‘ona‘auao ‘Ōiwi Hawai‘i o ka ‘Oihana Ho‘ona‘auao Pekelala i ho‘okumu ‘ia mai ai ‘o Lamakū, he papahana kōkua hele kulanui no nā kānaka koko Hawai‘i a puni ma lalo o ke alaka‘i ‘ana na ka ‘Aha Pūnana Leo. I mea ho‘i ‘o Lamakū e ho‘olako aku ana i nā kumu, nā mea noi‘i kālai‘ike a me nā ‘ohana mākaukau ma ka ‘auamo ‘ana i ka ho‘oikaika a ho‘omau ‘ia o ke ola o ka mauli Hawai‘i ma ka ‘ōnaehana ho‘ona‘auao kaiapuni ‘ōlelo Hawai‘i o Hawai‘i Moku‘āina nei.
I mea ho‘i e kō ai ia pahuhopu i helu ‘ia a‘ela o luna nei, koi ‘ia nā moho Lamakū e hō‘ea i kekahi pae mākaukau ma ka ‘ōlelo Hawai‘i. Koi pū ‘ia ka hana kaiāulu, ‘o ka maika‘i loa, ma kekahi honua kaiā‘ōlelo Hawai‘i. Ho‘okō nā moho Kahuawaiola i ka hana kaiāulu ma loko pono nō o ka lumi papa ‘ōlelo Hawai‘i; ho‘okō nā haumāna mulipuka i kekahi ‘ano noi‘i ‘ana ma luna o ka ho‘oikaika ‘ana i ka ‘ōnaehana ho‘ona‘auao kaiapuni ‘ōlelo Hawai‘i; a ho‘okō nā haumāna muapuka i nā koina hana kaiāulu ma kekahi honua ‘ōlelo Hawai‘i. He mea noi kū makahiki ‘o Lamakū na ka moho e hoihoi ana e kāko‘o ‘ia penei.
E hiki nō ho‘i ke noi i ‘ike hou aku ma ka ho‘oka‘a‘ike ‘ana me ko Lamakū:
‘Aha Pūnana Leo
Lamakū
96 Pu‘uhonu Place
Hilo, HI 96720
(808) 961-0093 / 1-877-E-OLA-MAU (365-2628)
lamaku@ahapunanaleo.org