>> Holomoana | >> Ho‘okele | >> Ho‘olauna
Hōkūalaka‘i: He wa‘a holo kai moana lipolipo
‘O ka pa‘a ‘ike ku‘una ka mea nui loa ma ka ho‘okele wa‘a maoli ‘ana. E like me ka mea i ‘ike ‘ia ma ke kanaka ‘ana o kēlā pae moku, kēia pae moku, ua lehia i ko Polenesia ke ‘ano ho‘okele wa‘a ma ke kilo ‘ana i ka hōkū, ke kia‘i ‘ana i ka pā ‘ana mai o ka makani, me ka maka‘ala ‘ana i ka lele ‘āluka ‘ana o ka manu. ‘A‘ohe na‘e i pa‘a ma kekahi ‘ano palapala ‘ana nā ki‘ina ho‘okele wa‘a pono‘ī e like me ka mea i ho‘ohana no‘eau ‘ia e nā hulu kūpuna hanohano. ‘O nā ki‘ina ho‘okele wa‘a e kū nei, he huina ia o ka ‘ike ku‘una na Mau Pialug me nā ‘ike ‘epekema o kēlā ‘ano, kēia ‘ano (kilohōkū, makemakika, kālaimoana, kālaianilā) i ho‘okolohua ‘ia ma luna o ke kai. He hō‘oia ahuwale ka holopono o ia huina ‘ike ke nānā ‘ia ka nui o ka holomoana ‘ana o ka wa‘a Hōkūle‘a mai ka MH 1976 a hiki i kēia a puni ka moana Pākīpika. No loko mai o ia mau holo ‘ana i hānau mai ai he huliau o ka nui wa‘a kaulua me nā haumāna e makamae ana a e ho‘omau i ia ‘ike ho‘okele wa‘a.