No ke komo ‘ana i ka hana
Māhele ‘ia kēia papahana ma ka ‘elua pae nui: ‘o ko ka ‘ōpio e lawelawe ana i nā haumāna o Ke Kula ‘O Nāwahīokalani‘ōpu‘u a me ko ka makua e lawelawe ana i nā mea hoihoi i nā pāhana honua ‘āina me ka honua kai. Kūkulu ‘ia ia mau pāhana e ho‘oulu a e ho‘oikaika ‘ia ai ka pa‘a ‘ana o ka ‘ōlelo Hawai‘i. E leka uila ‘ia nā nīnau iā: helani@ahapunanaleo.org
>> Hōkūalaka‘i | >> Honua Ho‘okolohua Ola | >> Māla
He Lani Ko Luna, He Honua Ko Lalo
He kikowaena ho‘ona‘auao hana lima ka papahana ‘o He Lani Ko Luna, He Honua Ko Lalo o Ke Kula ‘O Nāwahīokalani‘ōpu‘u, Kea‘au, Hawai‘i Mokupuni. Ho‘omaka akula kēia papahana ma ka MH 2003 e ho‘ohana ana i nā honua like ‘ole o waho o ka lumi papa ma‘amau e ‘imi ana i ka ho‘oikaika ‘ana a‘e i ka mākaukau ‘ōlelo Hawai‘i ma o ke ka‘akālai a‘o mauli ola Hawai‘i e ‘ike ai ke kanaka i ka pili ma waena o ka lani o luna, ka honua o lalo a me kēia nohona kanaka ‘ana kekahi e like nō ho‘i me ka mea e pono ai kekahi.
‘O ka ho‘oulu ‘ana i ke kanaka a ‘ae‘oia maika‘i ma nā mea e ho‘oulu ‘ia ai he kaiāulu ola pono, ‘o ia nā pahuhopu nui o kēia papahana nei. Ma loko o nā hana me nā ha‘awina a pau, kālele ‘ia ka hana kime, ka mālama kuleana a me ke alaka‘i ‘ana i loko o ke kuana‘ike mauli ola Hawai‘i: ‘o ka ‘ike ku‘una, ‘o ka ‘ōlelo he Hawai‘i, ‘o ka pili ‘uhane a pēia ho‘i ka lawena. Ho‘ohana ‘ia nā honua a me nā kumu waiwai loa‘a mua o ka ‘Aha Pūnana Leo i mea e pono ai nā hana a me nā pāhana a pau o kēia kikowaena ho‘ona‘auao hana lima nei.