No ka hānai ‘ana i ke keiki ‘ōlelo Hawai‘i
‘O ka mea ma‘amau e hopohopo nei ka makua hoihoi i ka ho‘okomo i ke keiki i loko o ka ‘ōlelo Hawai‘i, ‘o ia ka mākau‘ōlelo Pelekānia: “E hā‘ule nō paha ka‘u keiki i hope ma ka ‘ike ‘ōlelo Pelekānia, a ma ka ‘ike kālai‘ike laulā?” ‘A‘OLE LOA! Puka nō nā keiki hele i ka na‘auao i loko o ka ‘ōlelo Hawai‘i ma ka pae like, a ma ‘ō aku paha, o ko ke keiki hoa like o ke kula ‘ōlelo Pelekānia piha o Hawai‘i nei. Ua pili ia ‘ano puka ‘ana me ka mea e ‘ike ‘ia nei i waena o ka pō‘aiapili like o kekahi ‘āina i loko o kekahi ‘ōlelo, a mau ‘ōlelo paha hou aku paha. ‘O ka ‘oia‘i‘o, ‘o nā keiki komo a puka mai loko aku o ke kula ‘ōlelo Hawai‘i, ‘o lākou pū kekahi i ‘ae ‘ia, a i puka paha, mai Stanford, Loyola Marymount a me Oxford kekahi.
Ma ka ho‘okomo ‘ia o ke keiki i loko o ke kula kamali‘i Pūnana Leo, ‘o ke ke‘ehi mua ihola nō ia i loko o ke aukahi ho‘ona‘auao e kālele ‘o‘ole‘a ana ma luna o ka na‘auao i loko o ka mauli Hawai‘i. Nōkī iho i loko o ka haumāna kaiapuni ‘ōlelo Hawai‘i ka makakau ao holo‘oko‘a i loko ho‘i o ke kuana‘ike mauli Hawai‘i: ‘o ka ‘ōlelo ka mea e kuana‘ike ai ia makakau ‘ana. Ili mai ho‘i he ‘ike kino i ka mo‘omeheu Hawai‘i me ke kuana‘ike e hāpai ana i ka nui i luna, a “kūneki ihola ka ho‘okahi, noho iho i lalo.” Pōmaika‘i pū ke keiki i ke komo nui ‘ana o ka ‘ohana i loko o ia pō‘aiapili ho‘ona‘auao, a ma waho aku o ia mau mea a pau i helu ‘ia a‘ela ma luna pono nei, e pa‘a pū i ke keiki ka mākau e wali loa ai ka ‘ōlelo Pelekānia i ke keiki kekahi.