E Ola Ka ʻŌlelo Hawaiʻi | The Hawaiian Language Shall Live

Surveys

E ka poʻe hiʻipoi a pūlama i ka ʻōlelo ʻōiwi o ko kākou one hānau aloha ē, me ʻoukou ka welina o ke aloha. 

He iwakālua a ʻoi makahiki ka puka ʻana aku o nā haumāna ʻōlelo Hawaiʻi mai nā kula kaiapuni aku. Ua ʻoi loa aku nā makahiki o ka puka ʻana aku o nā haumāna ʻōlelo Hawaiʻi mai ke kulanui aku. He mau kumu ʻōlelo Hawaiʻi kēia mau kānaka a pau? ʻAʻole loa. He kumu ʻōlelo Hawaiʻi kekahi, a ʻo kekahi hoʻi, he kauka, he loio, he limahana ma ka hale ʻaina, ma ka hale kūʻai, ma ka hui mokulele, a pēlā aku. Aia ka poʻe ʻōlelo Hawaiʻi ma nā wahi a pau o ko kākou mau kaiaulu. Eia naʻe, a hiki i kēia, kaupalena ʻia ke ola o ka ʻōlelo Hawaiʻi i nā lumi papa a me nā hale. 

Makemake mākou e ʻimi aku i nā wahi e hoʻoulu aʻe ai i ka ʻōlelo Hawaiʻi ma nā kaiaulu ma waena o ko Hawaiʻi Pae ʻĀina, a makemake mākou i kou kōkua. Ke noi haʻahaʻa ʻia nei ka poʻe ʻōlelo Hawaiʻi a pau e hoʻopihapiha i ke anamanaʻo ʻo ‘Ōlelo Hawaiʻi Au. E hōʻike mai ana kēia anamanaʻo iā mākou kahi e hele ai, a kahi hoʻi e hana ai ka poʻe ʻōlelo Hawaiʻi, a ʻo ia mau wahi nō paha kekahi mau wahi a mākou e ʻimi aku ai i ka hoʻonui a me ka hoʻomāhuahua ʻana aʻe i ke ola o kā kākou ʻōlelo makuahine aloha. 

Makemake mākou e ʻike ʻia, lohe ʻia, a ʻōlelo ʻia ka ʻōlelo Hawaiʻi ma nā wahi a pau o Hawaiʻi, a ʻaʻole hiki iā makou ke hoʻokō i kēia pahuhopu me ka ʻole o kou kōkua. E ʻoluʻolu, e hoʻokaʻawale i ʻelima minuke, e kaomi ma ke pihi ma lalo iho nei a e pane aku i nā nīnau o ke anamanaʻo.

Mahalo nui i kou kōkua ʻana mai. E ola ka ʻōlelo Hawaiʻi!

 

image

image

image