Moʻolelo Pani Makahiki 2018

 Aloha Kalikimaka!

As we near the end of 2018 and complete our 35th year of service through the ʻAha Pūnana Leo, we know there are hundreds of stories about the way our papahana has impacted our community from our keiki and their ʻohana, to our kumu and alakaʻi. Many times there are those who are fortunate enough to have been involved in all of these capacities, as is the case with Nāmaka Rawlins, who took some time to reflect on her own ʻAha Pūnana Leo journey below. We wish you a merry holiday season filled with love and appreciation for those close to you. Mahalo for your commitment to our community.

ʻAha Pūnana Leo–Piha 35 Makahiki

Ke Kula Maikaʻi

na Nāmaka Rawlins


“Hele au i ke kula maikaʻi ma ka Pūnana Leo o Hilo…”

image

I ka manawa mua aʻu i lohe ai i kuʻu moʻopuna e hīmeni ana i ia mele aloha, maopopo leʻa iaʻu ke kumu no kaʻu hana ola. Himeni ‘ia kēia mele no 35 mau makahiki. Ua like ka ʻike leʻa i loko o nā kamaliʻi, nā kumu, nā mākua, nā kūpuna, ka ʻohana Pūnana Leo; e ola ka ʻōlelo Hawaiʻi!

Hoʻomanaʻo au i ka hōʻea aku i ke Kulanui o Hawaiʻi ma Hilo ma Kepakemapa 1983. ʻO ia ka lā i hoʻoholo ai e hoʻi i ke kula e aʻo i ka ʻōlelo Hawaiʻi. Na Kauanoe Kamanā, koʻu hoakula ma ke kula kiʻekiʻe ʻo Kamehameha, i paipai iaʻu e kipa i kāna papa makahiki ʻekahi o ka ʻōlelo Hawaiʻi. Ma koʻu kipa ʻana i ia papa, ua ʻike maka a lohe pepeiao i ka ʻōlelo makuahine, a ulu aʻela nō ka ʻiʻini i loko oʻu no ke aʻo ʻana i ka ʻōlelo kupa o ka ʻāina.

image

Ua haʻi mai ʻo Kauanoe iaʻu no ka ʻAha Pūnana Leo. ʻAkahi hoʻi a hoʻokumu ʻia ma ia makahiki no ka moemoeā e hoʻi hou ka mana ola o ka ʻōlelo Hawaiʻi i kona kūlana o ka ʻāina aloha. Ua paipai ʻo ia iaʻu e hana pū ma kēia hana koʻikoʻi ma ka hoʻonaʻauao kamaliʻi ma ke kula ʻōlelo Hawaiʻi e like pū nō me ke kula Kōhanga Reo ma Aoteaora.

Ua hoʻokumu ʻia ka Pūnana Leo o Hilo ma ka makahiki 1985 ma kekahi hale hoʻolimalima ma ke alanui ʻo Kinoʻole. Ua hoʻomaka ke kula ma ʻApelila 1985 ma lalo o nā ʻēheu o nā kumu a me ke kupuna hiwahiwa ʻo Tūtū Lee Hong. Ua hoʻomaka ka Pūnana Leo o Honolulu he ʻehā lā ma hope me nā kumu a me ke kupuna lua ʻole ʻo Tūtū Lolena Nicholas. Haʻaheo mākou i nā Pūnana Leo mua i piha i nā ʻohana i hopu i ka moemoeā hoʻokahi.

Ua kōkua manawaleʻa au ma nā hana like ʻole ma ka Pūnana Leo o Hilo no ʻelima makahiki. He pōmaikaʻi nō ka hana pū a aʻo mai nā kūpuna mai a aia ko lākou mau kiʻi ma ka waihona kiʻi ma ke koleke ʻo Ka Haka ʻUla o Keʻelikōlani. Hāmama ka puʻuwai o nā Pūnana Leo no nā kūpuna i hoʻokumu i nā Pūnana Leo a me nā haumāna kulanui i hana pū.

Ma ka makahiki 1990, ua lilo au i Luna Hoʻokele no ka ʻAha Pūnana Leo. Ua noho au ma ia kūlana a kokoke e piha 20 makahiki. Ma ia mau makahiki i wehe ʻia ai ka nui o nā kula kamaliʻi ma ʻelima mokupuni. He ʻekolu wale nō Luna Hoʻokele no kēia mau makahiki he 35. Ua noho mai ʻo Amy Kalili a ma hope mai ʻo ʻEkekela Aiona. I kēia makahiki hanohano o ka pāʻoihana ʻAha Pūnana Leo, ua komo pū mai ʻo Kaʻiulani Laehā. ʻO Kaʻiulani ka hā o nā Luna Hoʻokele e alakaʻi ana i ka pāʻoihana i mua.

He mau limahana ko ka ʻAha Pūnana Leo e ʻimi like ana i ka nuʻukia ʻo E Ola Ka ʻŌlelo Hawaiʻi. Mai loko mai o nā Pūnana e hoʻohua ana i nā keiki ʻōlelo Hawaiʻi. He keʻena e noho ana nā kānaka e kākoʻo ana i nā Pūnana Leo ma ka ʻaoʻao a pau o nā kula kamaliʻi.

image

 

 

 

 

 

 

 

 


ʻAʻole i pau ka hana a ka ʻAha Pūnana Leo ma ke “kula kamaliʻi,” ua nui hou aʻe. Ua hoʻokumu ʻia ke Kula Kaiapuni Hawaiʻi ma luna o ka Pūnana Leo. Aia ka Papa Kaiapuni mua loa ma loko o ka Pūnana Leo o Hilo ma ka makahiki 1986-1987. Ma ka hoʻokele o ka ʻAha Pūnana Leo a me ke kōkua o nā mākua noke mau, ua wehe ʻia ke Kula Kaiapuni Hawaiʻi ma Keaukaha a me Waiau i ka makahiki 1987 -1988.

image

 

 

 

 

 

 

 

 


“E lohe mai iā mākou i ka ʻōlelo kupa o ka ʻāina

E lohe mai iā mākou i nā keiki o ka Pūnana Leo…”

No 35 mau makahiki, hīmeni ʻia kēia paukū me ka ʻiʻini a me ka ikaika o nā leo haʻaheo ma nā kula kamaliʻi a pau ma ka pae ʻāina, mai Hawaiʻi moku o Keawe a i Niʻihau a Kahelelani. Nui nā ʻaoʻao o kēia moʻolelo o ka ʻAha Pūnana Leo. ʻO ka manaʻoʻiʻo, ka manaʻolana a me ke aloha ke kaukaʻi ʻia. ʻAe, e lohe mai iā kākou, i ka ʻōlelo kupa o ka ʻāina.

E Ola Ka ʻŌlelo Hawaiʻi!

top