Aloha nui ʻoe e ʻĀnelalani
Kahi hoa i ʻimi like i ka naʻauao
E mālamalama ai ko kāua lāhui aloha
ʻIke akula ʻoe i ka ʻīnea me ka pōmaikaʻi
E noho mehameha au i ʻŪpēloa
I ka ulu lehua kau maka
Auē kuʻu hoa o ka pūnana manu
He haili ʻōpua no ke Kanilehua
ʻO ʻoe ka lehua o ka ēulu pipili ka lani
I ka lani ʻoe i hoʻi aku ai
E maha i ke apo pumehana o ka Makua
Eia mākou ke waiho nei me ke kūmākena
Ma nā kahawai lau aʻo Hilo
Puīa ke ʻala o ka pīkake i Laʻiakeha
Kau keha i ka poli Waiākea i ka Uluau
Kuʻu hoa kāmau kīʻaha waina ʻulaʻula
Ka loea hoʻi o ka ʻenehana kamepiula
Ma nā kihi ʻehā o ka honua
I pā aku ai ko ʻike no ka ʻōlelo makuahine
Ua ahuwale nā kiʻowai o Kūlanihākoʻi
Wahine kele honua ma ka nā ʻale o ka moana nui a Kāne
Haʻalele aku i ke one wali o ʻŌhele
ʻŌhele ʻoe i ke ala hoʻi ʻole mai
ʻEleʻele Hilo hoʻopanopano i ka ua
Ua pulupē ka nahele o Panaʻewa
Me nā lehua o Mokupane
Aloha nō ka pua hiwahiwa o Wahiawā
Kahi moʻopuna aloha na Kaʻiliponi
Uluwehi Leilehua i ko kipona aloha
Kuʻu akula ka luhi kino
E holo ʻoe i ke kai kāʻili lā i Lehua
Me ou mau kūpuna e noho akula
Aloha nō ka makani i lawe lilo i kuʻu hoa
Kuʻu hoa i minamina nui ʻia e ka nui manu
Auē kuʻu hoa ē!
Aloha nō hoʻi ʻoe lā ē!
Na Kainani Kahaunaele
4 Iune 2009